Mar 1 | KYG | STEP | Alagepa faigoko ge'amo Yesu Kalaisi Goti mafa'ne'amo ava gemo ina kava'mo huno aepa fai'niye.

Mark 1

Yoni'a ani'mo faleno ne'apateya vekamo'a aeno hakalo huno hapa pai'niya gemae.

(Mt 3:1-12; Lu 3:1-9; 3:15-17; Yo 1:19-28)

1 Alagepa faigoko ge'amo Yesu Kalaisi Goti mafa'ne'amo ava gemo ina kava'mo huno aepa fai'niye. 2 Gotitegati gemo alini e'ana ae'ana hakalo hu'ana hapa nepai'a vekala'moganimo ani hogoteno aepa fai'niya kavafe'mo ava gemo hu'ana avo'mo kae male'na'ae. Mago vekamo'a huno'ae'mo, Goti'a huno'ae'mo,

ago, huno, apa veka'nimo esiya ka'mo valino atesiya vekamo ali'na atesugeno uno hogotegaiye, huno hu'niye,
huno avo'mo kae male'nigeno mago alu vekamo'a huno'ae'mo,

3 Mago vekamo'a ka'me kotega mai'neno alopa gefati'mo ge huno'ae'mo, Ala kava ne'mo ka'mo valitapa ateyo. Esiya ka'mo api ka'mo valitapa ateyo, huno hu'niye,
huno avo'mo kae male'niye. 4 Inagi Yoni'a ka'me kotegamo eno afole aiteno ani'mo faleno apate'niye. Yoni'a, lapaipamo alitapa afe letetapa ani'mo falegeno'ao Goti'a hosu kavatapimo alino ataleno, huno aeno hakalo huno hapa paige hapa paige huno mai'niye. 5 Asole vaya'mo agaetegamo Yutiya kotegati'mo uge Yulusalemu taonifati'mo uge hu'a u'a afi'nae. Apakaemo hosu kava'apie'mo ae'a hakalo hu'nageno'ae'mo Yoneni anipi'mo ani'mo faleno apate'niye. 6 Yoni kukena'amo kamo afumo ayokateti'mo alo hu malefa kukenamo alino vaiteno afafale'mo kamo afumo agufaleti'mo alo hu malefa mapalu'mo alino aeteno akenu'e afela lumemo anu'e'mo neno mai'niye. 7 Agaemo ina gemo huno hapa pai'niye. Nagae nakame huno ne'eya vekamo'a aeno naga se'niye. Alagi ago aeno naga se'niya'mofe'mo afa'a ape hu'na mai'ne'na su'amo nofi'amo afa'a hakalu osegauve. 8 Nagaemo ani'aletike'mo fale'na nelapatova'monanafa Goti aote Auneme'aleti'mo faleno lapategaiye.

Yoni'a Yesu'mo ani'mo faleno atetegeno'ae'mo Satani'a amalageka hu'niya gemae.

(Mt 3:13-17; Lu 3:21-22)

9 Ani afina'mo Yesu'a Galeliya kotega Nasalasa taonifati'mo ataleno e'nigeno Yoni'a Yoneni anipi'mo ani'mo faleno ate'niye. 10 Yesu'a anipati'mo haineno ageyana koku'na'mo halo ai'nigeno Goti Auneme'amo kaugoyave namagana huno agaetegamo emine'nigeno age'niye. 11 Mago vekamo'a koku'napati'mo ge huno'ae'mo, lusi kava huno ne'nahaiya mafa'ne'nimo mai'nane. Amuse hu'na nekatove, huno ha pai'niye. 12 Huno ha pai'nigeno'ae'mo malage huno Goti Auneme'amo'a alino ategeno ka'me kotegamo u'niye. 13 Uno foti'a afina'mo mai'nigeno'ae'mo Satani'a amalageka hu'niye. Ani kotega afela afu'e yagagafa'e'mo mai'naya kotegamo uno mai'nige'apae'mo enisole vaya'mogimo emi e'a yagai'a ate'nae.

Yesu'a lole'e lole'e vaya'mo noyame ne'aliya vaya'aife'mo etapa nakame hiyo, huno ge hu'niya gemae.

(Mt 4:12-17; Lu 4:14-15)

14 Apakaemo ani afina'mo Yoni'a ago kalavusi hu'a ate'nageno mai'nigeno'ae'mo Yesu'a Galeliya kotegamo uno Goti'a yagaino apatesiya kavafe'mo alagepa faigoko gemo aeno hakalo huno hapa pai'niye. 15 Hapa paino'ae'mo, alagepa afina'mo ago afole ai'niye. Goti'a vaya'aite'mo yagaino apatesiya afina'mo alagi hogo hu'niyanagi lapaipamo alitapa afe letetapa alagepa faigoko ge'ae'mo lapakesa afitapa fatago hiyo, huno hapa pai'niye. 16 Inagi Yesu'a Galeliya kotegamo alopa ani kotu agi'nale'mo umenitata nehuno'ae'mo ageyana Saimoni'e agana'amo'mo E'nalu'e'mo noyame ne'ali'a vekala'mo umeni'animo anipi'mo yaga au'ana ne'mala'ageno anake'niye. 17 Anaketeno'ae'mo noyamemo alitana apavayu hulitana ne'a'a kava hutana vaya'mo nagaetegamo apavalelitana esa'afe'mo ali'na lanaya malegauvanagi etana nakame hi'ao, huno hana pai'nige'ana umeni'animo atale'e'ana akame hu'na'ae. 19 Agaemo aise'amo uno ageyana lole konagala'mo Yemisi'e Yoni'e'mo Sepeti mafa'nela'mo sipifi'mo mai'ne'ana umeni'animo nefakani'ageno anake'niye. 20 Anaketeno'ae'mo ge hu'nige'ana sipifi'mo afo'animo'e ali'ya'ale'mo mai'naya vaya'e'mo apatale'e'ana akame hu'na'ae.

Yesu'a mago vekamo aipafati'mo hosu aune vekamo alino hafaino atale'niya gemae.

(Lu 4:31-37)

21 Yesu'e ge'amo ne'afiya vaya'e'mo Kapeneyamu taonifi'mo u'a mai'nageno Sapati afina'mo afole ai'nigeno Yesu'a Yu vaya'ai mono nopi'mo haino alino apaya male'niye. 22 Ke'aepa gemo avo'mo kae'a ali'a apaya ne'malaya vayakana huno alino apaya o'male'niya'monanafa himamu'aleti'mo alino apaya male'nige'a afite'apae'mo hapau ai'nae. 23 Ani afina'mo mago vekamo aipafi'mo hosu aune vekamo mai'niya vekamo mono nopi'mo mai'neno'ae'mo, 24 Nasalasa taonifi vekamo Yesuo, huno, lagaetegamo na kava hisanafe'mo e'nane. Alika lago'ya faika latalesanafe'mo e'napiye. Afa'a lato. Kage'novana Goti aote vekamo mai'nane, huno alopa gefati'mo hu'niye. 25 Yesu'a, Ge osu'neka aipafati'mo emikeno, huno lokiya ge huno ha pai'nigeno'ae'mo 26 hosu aune vekamo'a agufale'mo alino uti uti aino ateteno alopa gefati'mo kagegage huteno aipafati'mo emine'niye. 27 Vaya'mogi agete'apae'mo hapau aite'a, na agufa kava'mo nehiye. Haiya agufa saufa geleti'mo alino apaya ne'male. Agaemo himamu'aleti'mo ge nehige'apae'mo hosu apaune vaya'mogi ge'amo afi'nae, hu'a hute'a hapau ai'nae. 28 Ani kava'mo hu'nigeno malage huno Yesufe ava gemo'a aino atagu faeno muki Galeliya kotegamo uneno hu'niye.

Yesu'a muki vaya'mo alino alagepa huno apate'niya gemae.

(Mt 8:14-15; Lu 4:38-39)

29 Yesu'e ge'amo ne'afiya vaya'e'mo mono nopati'mo emi e'apae'mo Yemisi'agi Yoni'agi hu'a Saimonigani E'nalugani nopi'mo hai'a mai'nae. 30 Saimoni ayemo'amo'mo amuko kaita'mo hau'nigeno havaeno mai'niye. Yesu'a haino mai'nige'apae'mo, kaita hau'nigeno havaeno mai'niye, hu'a ha pai'nageno 31 uno ayate'mo alino he tino ate'nigeno amuko kaita hau'niya ya'amo hagegeno uno ne'ya'mo alo huno apate'niye. 32 Yegemo lamino fale'nige'apae'mo mago vaya'mogi Yesutegamo kaita hapau'niya vayanagi hosu apaune vaya'mo apaipafi'mo ne'maiya vayanagi hu'a apavaleli'a e'nae. 33 Muki ani taonifi'mo mai'naya vaya'mo e'a kipate'mo ali'a anupa hu'a mai'nae. 34 Inagi Yesu'a muki alu kaita alu kaita'mo hapau'niya vaya'mo alino hapageno apatege hosu apaune vaya'mo vaya'ai apaipafati'mo alino hapa faino apatalege huno mai'niye. Hosu apaune vaya'mogimo ago age'naya'mofe'mo, ge osiyo, huno hapa pai'niye.

Yesu'a Galeliya kotegamo umenitata huno Goti gemo aeno hakalo huno hapa pai'niya gemae.

(Lu 4:42-44)

35 Egamo kotigefe'mo hu'nigeno'ae'mo Yesu'a he tino taonifati'mo atalenuno vaya'mo o'mai'naya aupilagamo nunumu huno mai'niye. 36 Nunumu huno mai'nige'apae'mo Saimoni'e avagi hu'a u'naya vaya'e'mo kahauya huli'u'a agete'apae'mo, muki vaya'mogimo kagaemo kagesayafe'mo kahauya huli'a ne'ae, hu'a ha pai'nae. 38 Ha pai'nageno'ae'mo, ataleta alu taonifilagamo vigetao. Muki taoni'afi taoni'afi'mo umenitata hu'na ae'na hakalo hu'na hapa paisuvafeke'mo emi'ne'nove, huno hapa pai'niye. 39 Hapa paiteno muki Galeliya kotegamo umenitata huno muki asole mono no'afi no'afi'mo aeno hakalo huno hapa paige hosu apaune vaya'aina alino hapafaino apatalege hu'niye.

Yesu'a lepalosi ya'mo hau'niya vekamo alino alagepa huno ate'niya gemae.

(Mt 8:1-4; Lu 5:12-16)

40 Mago lepalosi ya'mo hau'niya vekamo Yesutegamo eno mopafi'mo ale'ya faino mai'neno'ae'mo, kahao ke hove, huno, kahau'nisiyana afa'a alika alagepa huka nategane, huno ha pai'nigeno'ae'mo 41 Yesu'a hau huno ateteno'ae'mo aya'mo alino ataleno agufale'mo male'neno'ae'mo, nahau'niyanagi afa'a alagepa huka maiyo, huno ha pai'niye. 42 Ha pai'nigeno lepalosi ya'amo alagi hano hu'nigeno afa agufamo hamale'niye. 43 Yesu'a lokiya ge huno ha paino'ae'mo, afiyo, huno, mago nefe'mo uka ha opaika mono huno ne'apateya vekalegage'mo ugeno'ao kagufamo ageno. Kagufamo afa'a hane'ninage'a agesayafe'mo Mosese'a laginago vaya'aife'mo, ofalinimo alinitutapa amiyo, huno hu'niya ofalinimo alinikuka amiyo, huno ha paiteno alino ate'nigeno u'niye. 45 Ani gemo huno ha pai'niya'monanafa ne'uno'ae'mo muki vaya'aife'mo hapa paimale hapa paimale hulino u'niye. Ani kava'mo hu'niya'mofe'mo Yesu'a muki vaya'ai apaulagale'mo taonifi'mo afa'a o'u'niye. Vaya'mo o'mai'naya kotegamo uno mai'nige'apae'mo agaetegamo muki haopalegati'mo ete ete hu'nae.